Hukumar Custom ta ce jami’anta sun kama kwantenoni 34 makare da lalatacciyar shinkafa da aka yi fasa kaurinsu zuwa tashar jiragen ruwa ta Tin Can Island dake Legas daga kasashen Thailand da China.
Shugaban hukumar, Hamid Ali shine ya sanar da haka ranar Talata, ya ce wasu daga cikin buhunan shinkafar wa’adin amfani da su ya kare yayin da wasu kuma suke dab da karewa.
Kama kwantenonin na zuwa ne kwanaki hudu bayan da hukumar ta kama kwantenoni 25 makare da kayan abinci da wa’adinsu ya kare duk a tashar jirgin kuma kwana daya bayan da aka gano wasu kwantenoni hudu makare da kifi da ya fara rubewa a yankin Apapa dake jihar.
Ali ya ce hukumar ta kuma kwace kwantena 11 dauke da magunguna da ba ayi musu rijista, kwantenoni biyu ta tsofaffin tayar mota,kwantena daya ta kayan gwanjo da kuma kwantenoni hudu na man girki.
