Hakkin mallakar hoto
Gwamnatin jihar Filato
Alkalan kotun koli sun kori karar dan takarar gwamnan jam’iyyar PDP na jihar Filato, Jeremiah Useni, inda kotu ta tabbatar da Simon Lalong na jam’iyyar APC a matsayin mutumin da ya lashe zaben 2019.
Sakamakon zaben zagaye na biyu da aka yi a ranar 26 ga watan Maris din 2019 ya nuna Gwamna Lalong ya kayar da tsohon ministan Abuja Jeremiah Useni na jam’iyyar PDP.
An gudanar da zaben ne a mazabun kananan hukumomi tara wadanda ba a kammala ba a zaben farko na gwamna da aka gudanar a ranar 9 ga Maris.
Jam’iyyar APC ta lashe kananan hukumomi shida a mazabun da aka sake zaben. Jam’iyyar PDP kuma ta lashe kananan hukumomi uku.
Yanzu APC ta lashe kananan hukumomi 11 cikin 17 na jihar Filato yayin da PDP ta lashe kananan hukumomi guda shida.
Filato na cikin jihohin da suka ja hankali ake karasa zabukan gwamnoni wadanda suka hada da Bauchi da Benue da Kano da kuma Sokoto.
