Hukumar Tsaro da Kare Fararen Hula ta Kasa (NSCDC) ta kama wani matashi mai suna Nasiru Sulaiman, mai shekara 27, bisa zargin yunkurin satar babur mai kafa uku (Adaidaita Sahu) a kan titin IBB da ke Kano.
A cewar hukumar, ana zargin Nasiru, dan karamar hukumar Babura ta Jihar Jigawa, da ya yaudari direban Adaidaita Sahun ta hanyar aikansa wani aiki. Bayan direban ya tafi, sai ya cire makullin kunna babur domin guduwa da shi.
Sai dai wasu mazauna yankin masu lura sun yi zargin motsinsa, suka tare shi kafin ya tsere, sannan suka mika shi ga jami’an NSCDC.
Hukumar ta bayyana cewa ta kammala bincike kan lamarin, kuma za ta gurfanar da wanda ake zargin a gaban kotu domin fuskantar hukunci.
NSCDC Ta Kama Matashi Kan Yunkurin Satar Adaidaita Sahu A Kano
