Gwamnatin jihar Filato ta saka dokar hana fita a ƙananan hukumomi uku na jihar

Gwamnatin Jihar Filato ta sanya dokar hana fita daga yamma zuwa safiya a kananan hukumomin Barkin Ladi, Bokkos da Mangu biyo bayan hare-hare da kisan jama’a da aka yi a yankunan a ƙananan hukumomin.

Wakilin jaridar Daily Trust ya ruwaito cewa cikin kwana biyu, sama da mutane 20 ciki har da mata da yara, su ka rasa rayukansu a Mangu, Barkin Ladi, Bokkos da Riyom. An kuma ƙone gidaje da dama a hare-haren.

Yayin sanar da dokar hana fita, Kwamishinan Yada Labarai da Sadarwa na Jihar Filato, Joyce Ramnap, ta ce matakin ya fara aiki nan take. Ta bayyana cewa daga yanzu, zirga-zirga za ta kasance daga ƙarfe 6:00 na yamma zuwa 6:00 na safe a yankunan da abin ya shafa har sai an ba da sanarwa ta gaba.

Ramnap ta ce: 
“Gwamnatin Jihar Filato ta ayyana dokar hana fita daga yamma zuwa safiya a kananan hukumomin Barkin Ladi, Bokkos da Mangu domin kiyaye zaman lafiya da kuma dakile barazanar tsaro da ke tasowa a yankin. 

“Daga yau, Litinin, 21 ga Satumba, 2026, zirga-zirga za ta  kasance daga ƙarfe 6:00 na yamma zuwa 6:00 na safe har sai an fitar da  sanarwa ta gaba. 

“Yanzu ne lokacin da yakamata gwamnati ƙarƙashin jagorancin Mai Girma, Caleb Manasseh Mutfwang, Esq, ta ɗauki wannan mataki  domin bai wa jami’an tsaro damar dawo da zaman lafiya a  yankunan, kare rayuka, da kuma hana rikici a cikin al’umma. 

“Saboda haka, dukkan mazauna yankunan da abin ya shafa ana sa ran za su bi umarnin gwamnati domin tsaron kansu.