Wata mata mai suna,Chinasa Ukaonu daga jihar Imo ta amsa laifin sayar da jaririnta kan kudi naira dubu ₦500,000.
A cewar rundunar yan sandan jihar,Ukaonu ta amsa laifin nata ne bayan da aka kamata tare da wasu ma’aikatan aikin jinya su biyu da suka taimaka mata wajen sayar da jaririn.
Ma’aikatan jiyar da ake zargi da taimaka mata sun hada da Dorothy Esmonu da Catherine Eke.
Orlando Ikeokwu, mai magana da yawun rundunar yan sandan jihar ya bayyana cewa matar da ake zargi da sayan jaririn, Chioma Amadi ita ma an kama ta.
Ya ce kama mutanen da ake zargi ya taimaka wajen ceto jaririn.
Ikeokwu ya kara da cewa kwamishinan yan sandan jihar,Rabiu Ladodo ya umarci yan sandan dake binciken batun da su gurfanar da su gaban kotu da zarar an kammala bincike.