Ambaliyar Ruwa Na Barazana Ga Al’ummomi 8,000 Da Makarantu 4,500 A Jihohi 15

Hukumar Kula da Ruwa ta Najeriya (NiHSA) ta yi gargadin cewa sama da al’ummomi 8,000 da makarantu 4,500 a jihohi 15 na cikin barazanar ambaliyar ruwa tsakanin 19 zuwa 25 ga Satumba, 2026.

Hukumar ta ce karuwar ruwan koguna na iya haddasa ambaliyar ruwa a wuraren da ke cikin hadari, lamarin da ka iya shafar makarantu, asibitoci, kasuwanni, wuraren ibada da gonaki.

Daraktan-Janar kuma Babban Jami’in Gudanarwa na NiHSA, Arch Umar Mohammed, ne ya bayyana hakan a cikin sabon Gargadin Ambaliyar Kasa da hukumar ta fitar ranar Asabar.

Jihohin da gargadin ya shafa sun hada da Imo, Cross River, Delta, Ebonyi, Benue, Anambra, Akwa Ibom, Edo, Enugu, Bayelsa, Kogi, Abia, Taraba, Rivers da Lagos.

Mohammed ya bukaci gwamnatocin jihohin da abin ya shafa da su gaggauta daukar matakan kwashe mutanen da ke zaune a wuraren da ke cikin hadari zuwa wuraren da suka fi aminci.