Shugabannin Kwalejojin Fasaha Sun Yi Alƙawarin Tallafa Wa Tinubu a Zaɓen 2027

Muhammadu SabiuHausa11 minutes ago



Kwamitin shugabannin kwalejojin fasaha na gwamnatin tarayya a Najeriya ya yi alƙawarin wayar da kan ma’aikata da ɗalibai domin su mara wa Shugaba Bola Tinubu baya a ƙoƙarinsa na sake zaɓe a 2027.

Shugaban kwamitin, wanda kuma shi ne shugaban Kwalejin Fasaha ta Auchi, Dakta Salisu Umar, ne ya bayyana hakan yayin ganawa da Sakataren Gwamnatin Tarayya, Sanata George Akume, a Abuja ranar Laraba.

A cikin wata sanarwa da Daraktan Yaɗa Labarai na ofishin Sakataren Gwamnatin Tarayya, Chris Ugwuegbulam, ya fitar, Umar ya ce kwamitin ya yanke shawarar mayar da martani ga matakan tallafin da gwamnatin Tinubu ta ɗauka a ɓangaren kwalejojin fasaha ta hanyar shirya ma’aikatansu da ɗalibai domin goyon bayan wa’adin mulkinsa na biyu.

Ya ce, “Kwamitin COFER ya yanke shawarar mayar da martani ga tallafin da gwamnati ta bayar ta hanyar tattara mambobinsa, ma’aikata da ɗalibai domin goyon bayan ƙudurin gwamnatin na sake zaɓe.”

Umar ya roƙi Akume da ya isar wa shugaban ƙasa godiyarsu da kuma alƙawarin goyon bayan da suka yi, yana mai tabbatar da cewa shugabannin kwalejojin fasaha na gwamnatin tarayya suna tare da Tinubu gabanin zaɓe mai zuwa.

Ya ƙara da cewa shugabannin kwalejojin sun haɗu a kan buƙatar bayar da gudummawa ga nasarar gwamnatin, kuma za su yi amfani da hanyoyin sadarwa da tasirin cibiyoyinsu wajen neman goyon baya ga shugaban ƙasar.

Umar ya yaba wa Tinubu kan matakan da ya ce ba a taɓa ganin irinsu ba wajen tallafa wa ɓangaren kwalejojin fasaha, yana mai cewa gwamnatin ta nuna sabon ƙuduri na amincewa da rawar da waɗannan makarantu ke takawa wajen bunƙasa ilimi da tattalin arzikin ƙasa.

A cewarsa, an daɗe ana ɗaukar kwalejojin fasaha a matsayin cibiyoyin ilimi na ƙasa da jami’o’i, kafin gwamnatin yanzu ta fara aiwatar da manufofi da shirye-shiryen rage wannan bambanci da kuma inganta matsayinsu.

Ya ce ziyarar tasu ta fi mayar da hankali ne kan nuna godiya ga Tinubu, ta hannun Sakataren Gwamnatin Tarayya, bisa tallafin da ake bai wa kwalejojin ta hannun Ma’aikatar Ilimi ta Tarayya da Hukumar Kula da Ilimin Fasaha (NBTE).

A nasa martanin, Akume, wanda Babban Sakataren Ofishin Ayyukan Gwamnati, Dakta Ibrahim Kana, ya wakilta, ya yaba wa shugabannin kwalejojin bisa alƙawarin da suka yi.

Ya ce Shugaba Tinubu ya himmatu wajen gina al’umma mai bai wa kowa dama, inda cibiyoyi da daidaikun mutane za su samu damar bayar da gudummawa ga ci gaban ƙasa.

Akume ya kuma jaddada ƙudurin gwamnatin tarayya na inganta kwalejojin fasaha domin ƙarfafa koyar da sana’o’i da fasahohi, bunƙasa koyon dabarun aiki da kuma magance ƙarancin ƙwararrun ma’aikata a ƙasar.

Dangane da bambancin da aka daɗe ana samu tsakanin masu takardar shaidar Babbar Difloma ta Ƙasa (HND) da masu digiri daga jami’o’i, Akume ya tabbatar wa tawagar cewa gwamnati na da niyyar tabbatar da adalci da daidaito.

Ya ce kudirin doka da ke gaban shugaban ƙasa kan wannan batu zai samu kulawar da ta dace domin a kammala matakan amincewa da shi.

Loading

Signing-in 3 seconds...

Signing-up 3 seconds...