

Rundunar Sojin Najeriya ta bayyana cewa hare-haren sama da rundunar haɗin gwiwa ta Operation Hadin Kai ta kai sun yi sanadin kashe mayaƙan ƙungiyar ISWAP guda 21 tare da jikkata wasu 10 a jihar Borno. An gudanar da hare-haren ne a ranakun 16 da 17 ga watan Nuwamba a yankunan Monguno da Kudancin Tafkin Chadi.
A cewar Mohammed Goni, mukaddashin jami’in yaɗa labarai na Operation Hadin Kai, an fara harin ne bayan samun bayanan sirri dake nuna cewa mayaƙan ISWAP suna matsowa zuwa Monguno. Wani jirgin leƙen asiri marar matuki (UAV) me ya gano su suna tafiya ta wata hanya a cikin daji da ke arewa maso gabashin Monguno.
Bayan ganinsu, rundunar ta kai daidaitaccen hari wanda ya kashe mayaƙa bakwai ciki har da wasu da ke da hannu wajen ƙera bama-baman IED. Rahotanni sun kuma nuna cewa wani ƙwararren masani kan haɗa bam din IED mai suna Abba Bomma ya samu mummunan rauni, yayin da wasu mayaƙa huɗu suka jikkata ƙwarai.
A wani harin na daban da aka kai a Arinna da ke kudancin Tafkin Chadi, an kashe wasu manyan jagororin ISWAP. Daga cikinsu akwai Mallam Sharki, ɗan majalisar shura kuma kwamandan tsaro na ƙungiyar, da kuma Abu Saad, shugaban yankin Sabon Tumbu.
Har ila yau, mayaƙa 12 sun mutu yayin harin, yayin da wasu biyar suka jikkata sosai. An kuma lalata babura da dama da mayaƙan ke amfani da su. Rundunar ta ce waɗannan hare-hare sun raunana shugabancin ISWAP, sun tarwatsa hanyoyin sarrafa bama-bamai na ƙungiyar, tare da rage ƙarfin ayyukanta a yankin.