Jonathan Ya Yi Gargadi  Kan Faruwar Rikicin Siyasa Gabanin Zaɓen 2027



Tsohon Shugaban Ƙasar Najeriya, Goodluck Jonathan, ya nuna damuwa matuƙa kan yadda yanayin siyasar ƙasar ke tafiya yayin da ake tunkarar zaɓen shekarar 2027. Ya ce akwai alamun da ke nuna yiwuwar samun rikice-rikice bayan zaɓe idan ba a ɗauki matakan da suka dace ba. A cewarsa, yana yawan samun kiraye-kiraye daga ‘yan Najeriya da abokan ƙasar daga sassa daban-daban na duniya waɗanda ke nuna damuwa kan makomar Najeriya.

Jonathan ya bayyana hakan ne a wani taron zaman lafiya da tsaro da gidauniyarsa ta shirya a Abuja mai taken “Kare Zaman Lafiya da Ƙarfafa Haɗin Kai a Muhallin Siyasa Mai Gasa.”Ya ce maimakon a gina aminci da fata mai kyau kafin zaɓe, ana samun ƙarin fargaba game da yiwuwar rikici bayan kammala zaɓukan.

Tsohon shugaban ya yi tir da yadda rashin haƙuri da ra’ayoyin siyasa daban-daban ke ƙaruwa. Ya ce wasu ‘yan siyasa ba sa son su amince da haƙƙin wasu na shiga takara ko bayyana ra’ayinsu. Haka kuma, ya nuna damuwa kan amfani da matasa wajen aikata tashe-tashen hankula da ayyukan daba a lokacin siyasa.

Jonathan ya ƙara da cewa wasu ƙungiyoyin siyasa da tawagogin yaƙin neman zaɓe sun fara kama da ƙungiyoyin asiri  inda mabiyansu ke nuna tsananin biyayya tare da ƙin jurewa duk wata fahimta ko ra’ayi da ya saɓa da nasu. Ya ce wannan hali na iya zama barazana ga dimokuraɗiyya da zaman lafiyar ƙasa.

Dangane da bangaren shari’a, Jonathan ya nuna damuwa game da yawaitar hukunce-hukuncen kotuna masu karo da juna kan batutuwa iri ɗaya. Ya gargadi cewa irin waɗannan saɓanin hukunci na iya rage amincewar jama’a ga tsarin shari’a. Ya ce idan mutane suka daina yarda da kotuna suka fara ɗaukar doka a hannunsu, hakan na iya jefa ƙasa cikin rashin zaman lafiya.

A ƙarshe, Jonathan ya yi kira ga ‘yan Najeriya da su guji siyasar ƙabilanci da addini, su mayar da hankali wajen zaɓar shugabanni masu ƙwarewa, nagarta da kishin ƙasa. Ya ce ci gaban Najeriya zai ta’allaka ne kan irin shugabannin da jama’a za su zaɓa a shekarar 2027, yana mai jaddada cewa ya kamata a fifita ƙwarewa da hidima ga al’umma fiye da son kai ko bambance-bambancen ƙabila da addini.

Loading

Signing-in 3 seconds...

Signing-up 3 seconds...