Sojoji sun kashe yan ta’adda tare da gano bindigogin AK-47  a Sokoto

Dakarun Rundunar Haɗin Gwiwa ta Yankin Arewa maso Yamma (Joint Task Force North West), ƙarƙashin Operation FANSAN YAMMA, sun kashe ƴan ta’adda biyu tare da ƙwace bindigogi kirar AK-47 guda huɗu da babura guda takwas a yayin wasu hare-haren kakkabe  yan bindiga daga dazuka da suka gudanar a Jihar Sakkwato.

Jami’in uaɗa labarai na rundunar, Aliyu Danja, ne ya bayyana hakan a cikin wata sanarwa da ya fitar ranar Juma’a.

Ya ce dakarun Sashe na 2 (S ne suka gudanar da hare-haren a ranar 15 ga watan Oktoba, inda suka yi artabu da ƴan ta’adda a dajin Waria.

A yayin wannan arangama, dakarun sun kashe ɗan ta’adda guda ɗaya tare da ƙwace bindigogi kirar AK-47 guda biyu, babura guda biyu da wasu kayayyaki daban-daban.

A wani farmaki na daban da aka kai a ƙauyen Sarma, dakarun sun sake yin artabu da wasu ƴan ta’adda, inda suka kashe ɗan ta’adda guda ɗaya, yayin da sauran suka tsere suka bar kayayyakinsu a wurin.

Bayan bincike da aka gudanar a yankin, an ƙwato ƙarin babura guda shida, bindigogi kirar AK-47 guda biyu, gidan zuba harsashivguda huɗu, harsasai guda 23, na’urar sadarwa guda ɗaya da sauran kayayyaki.

Danja ya ce waɗannan nasarori suna nuna ƙudurin dakarun na rushe cibiyoyin ƴan ta’adda da kuma dawo da zaman lafiya da tsaro a dukkan yankunan da rundunar ke aiki.

Ya kuma godewa al’umma bisa ci gaba da ba da goyon baya da haɗin kai, tare da buƙatar mazauna yankunan da su kasance cikin shiri tare da kai rahoton duk wani abin da ya tayar da zargi ga mafi kusa daga ofisoshin jami’an tsaro.