

Shugaba Bola Ahmed Tinubu ya bayar da umarnin a saki mutane 78 da aka kama bisa zargin kai hari ga ayarin motocinsa bayan sallar Juma’a a wani masallaci da ke unguwar Garki, Abuja. Matasa masu nuna rashin jin daɗi sun jefi ayarin da duwatsu yayin da shugaban ƙasar ke barin masallacin.
Mai magana da yawun rundunar ‘yan sanda ta FCT, Josephine Adeh, ta ce harin ya janyo lalacewar wasu motocin da ke cikin ayarin tare da jikkata wasu jami’an tsaro. Bayan faruwar lamarin, jami’an tsaro sun gudanar da samame na bayanan sirri wanda ya kai ga kama mutane 78 da ake zargi da hannu a harin.
Ta bayyana cewa Shugaba Tinubu ya yi afuwa ga waɗanda ake zargin, kuma Fadar Shugaban Ƙasa ta umarci a gargaɗe su sannan a sake su. Rundunar ‘yan sanda ta ce tana aiwatar da matakan da suka dace domin kammala sakin mutanen da aka kama.
Kwamishinan ‘yan sanda na birnin tarayya Abuja Ahmed Mohammed Sanusi, ya yi gargadi game da ayyukan tashin hankali, tayar da zaune tsaye da lalata dukiyoyi. Ya buƙaci jam’iyyun siyasa, ‘yan siyasa da magoya bayansu su rungumi siyasa ta lumana yayin da shirye-shiryen zaɓen shekarar 2027 ke ƙara kankama, tare da umartar jami’an tsaro su ƙara sa ido don tabbatar da tsaron mazauna Abuja.