
Rundunar ‘yan sandan Jihar Zamfara ta ce ta ceto mutane 19, wadanda suka hada da mata da kananan yara, bayan shafe kwanaki 22 a hannun masu garkuwa da mutane.
An yi garkuwa da mutanen ne a kauyen Tungar Haki da ke karamar hukumar Gusau, kafin daga bisani a kai su wani wuri a kauyen Kungurmi.
Rundunar ta bayyana cewa an ceto mutanen ne da misalin karfe 10 na safiyar Asabar, a wani samame na hadin gwiwa da jami’an sashen yaki da garkuwa da mutane, hukumar tsaro ta farin kaya (DSS) da mafarauta suka gudanar.
Ta ce jami’an tsaron sun kai samamen ne bayan samun bayanan sirri kan inda aka boye mutanen.
A cikin wata sanarwa da kakakin rundunar ‘yan sandan jihar, DSP Yazid Abubakar, ya fitar, ya ce an samu dukkan mutanen 19 cikin koshin lafiya, kuma tuni aka mayar da su ga iyalansu.
Kwamishinan ‘yan sandan jihar, Ahmad Muhammad Bello, ya yaba wa jami’an tsaron bisa hadin gwiwar da suka yi, wanda ya kai ga nasarar ceto mutanen.
Ya kuma jaddada kudurin rundunar na ci gaba da yaki da garkuwa da mutane da sauran laifuka, tare da kira ga al’ummar jihar da su rika bai wa hukumomin tsaro sahihan bayanai cikin gaggawa.