An Ba Wa Remi Tinubu Sarautar Jagaban Matan Zamfara

Majalisar Sarakunan Jihar Zamfara ta nada uwargidan Shugaban Najeriya, Sanata Oluremi Tinubu, sarautar gargajiya ta Jagaban Matan Zamfara.

An nada ta sarautar ne a ranar Juma’a, 13 ga Nuwamba, yayin ziyarar da ta kai jihar domin halartar gangamin matan jam’iyyar APC na shiyyar Arewa maso Yamma, wanda aka gudanar a Gusau.

Kafin nadin, Sanata Remi ta ziyarci sarakunan gargajiya na jihar. Daga bisani aka gudanar da bikin nadin a gidan gwamnatin Zamfara, inda dukkan sarakunan suka halarta.

A nata bangaren, uwargidan shugaban kasar ta nuna farin cikinta tare da godiya ga sarakunan bisa karramawar da suka yi mata.