Mutane Sama Da 50 Sun Mutu A Wani Fada Tsakanin Yan Bindiga Da Yan Banga A Zamfara

Wani kazamin fada tsakanin yan bindiga da yan banga ya yi sanadin mutuwar sama da mutum 50 a Jihar Zamfara, kamar yadda mazauna yankin suka shaida wa kamfanin dillancin labarai na AFP.

Majiyoyin sun ce yan banga daga kauyen Zoma da ke karamar hukumar Bukkuyum sun yi wa yan bindigar kwanton bauna ne a ranar Alhamis, yayin da suke wucewa ta wani kauye bayan sun yi garkuwa da wasu mutane a garin Gummi.

Wani mazaunin yankin da ya bukaci a sakaya sunansa ya ce yan banga sun kashe akalla yan bindiga 44, yayin da tara daga cikinsu suka rasa rayukansu a musayar wutar.

Rahotannin sun kuma bayyana cewa an kashe wani fitaccen dan bindiga mai suna Jiji, wanda ake zargin ya jagoranci sace mutane a kauyen.

Jihar Zamfara na daga cikin jihohin Arewa maso Yamma da ke fama da matsalar yan bindiga, wadanda ke kai hare-hare, yin garkuwa da mutane domin neman kudin fansa da kuma satar dabbobi.