Ana Fargabar Mutuwar Mutane Hudu, Wasu Da Dama Sun Jikkata Yayin Da Tirela Ta Kife A Kano

Ana fargabar mutuwar mutane hudu, yayin da wasu da dama suka jikkata bayan wata tirela makare da kaya ta kife a mahadar Hotoro Junction, da ke Jihar Kano.

Hatsarin ya faru ne da misalin ƙarfe 2:00 na dare a ranar Litinin, inda ya yi sanadin lalata wasu kadarori, mutuwar dabbobi da kuma watsewar kayayyakin da motar ke ɗauke da su.

Rahotanni sun bayyana cewa tirelar na kan hanyarta ne daga garin Potiskum na Jihar Yobe zuwa Fatakwal, babban birnin Jihar Rivers, lokacin da hatsarin ya auku.

Wasu daga cikin waɗanda suka shaida lamarin sun shaida wa wakilinmu, Khadija Iliyasu Kore, cewa direban motar bai san hanyar sosai ba, lamarin da ya sa ya rasa ikon sarrafa motar.

Wani ganau ya ce direban baƙo ne a yankin, kuma bai san hanyar ba. Ya ƙara da cewa motar ta fita daga hannun direban ne bayan da ake zargin birkinta ya samu matsala.

Hatsarin ya sake jawo kiraye-kirayen a sanya manyan alamomin hanya da na gargaɗi a muhimman mahadun tituna, domin sanar da direbobi haɗarin da ke gabansu da kuma ba su damar ɗaukar matakan kariya don kauce wa irin waɗannan haɗurra.