Jam’iyar APC ta lashe zaɓen ƙananan hukumomin jihar Kogi

Jam’iyyar  APC ta lashe dukkan kujerun shugabannin ƙananan hukumomi 21 da kuma kujerun kansiloli 239 a zaɓen ƙananan hukumomi da aka gudanar a jihar Kogi.

An gudanar da zaɓen ne a ranar Asabar a dukkan ƙananan hukumomi 21 da mazaɓu 239 na jihar.

Shugaban Hukumar Zaɓe Mai Zaman Kanta ta Jihar Kogi (KOSIEC) Mamman Nda-Eri, ya sanar da sakamakon a ranar Lahadi bayan kammala tattara sakamakon zaɓen a hedikwatar hukumar da ke Lokoja.



“Daga sakamakon da aka sanar ya zuwa yanzu, bisa ikon da aka ba ni a matsayina na shugaban Hukumar Zaɓe Mai Zaman Kanta ta Jihar Kogi, ina ayyana cewa APC ta lashe dukkan kujerun shugabannin ƙananan hukumomi 21 da kuma dukkan kujerun kansiloli 239 a jihar Kogi.

Don haka, an ayyana dukkan ’yan takarar APC a matsayin waɗanda aka zaɓa a kujerun shugabannin ƙananan hukumomi da na kansiloli a faɗin jihar Kogi.” a cewarsa

Ba wannan ne karo na farko ba da jam’iyya mai mulki ke lashe gaba ɗaya zaɓen ƙananan hukumomi ba.

A watan Yuni, APC ta kuma lashe dukkan kujerun shugabannin ƙananan hukumomi da na kansiloli a zaɓen ƙananan hukumomi na jihar Gombe.

Lokacin da yake sanar da sakamakon, shugaban Hukumar Zaɓe Mai Zaman Kanta ta Jihar Gombe (GOSIEC) Abdullahi Garba ya bayyana cewa APC ta lashe dukkan kujerun shugabannin ƙananan hukumomi 24 da kujerun kansiloli 240 a faɗin jihar.

Garba ya ƙara da cewa wannan shi ne karo na farko da aka gudanar da zaɓe a cikin ƙananan hukumomi 24 na gudanarwa, maimakon 11 da aka saba da su a baya, bayan ƙirƙirar sabbin  guda 13.