Majalisar Dattawa Ta Bukaci A Yi Bincike Kan Mutuwar Dan Bautar Ƙasa A Sansanin Enugu

Majalisar Dattawan Najeriya ta bayar da umarnin gudanar da bincike kan mutuwar wani dan bautar kasa na NYSC, Comrade Etimbuk Daniel, a sansanin horas da masu yi wa kasa hidima da ke jihar Enugu.

Matakin ya biyo bayan kudirin gaggawa da Sanata Aniekan Bassey mai wakiltar Akwa Ibom ta Arewa maso Gabas a karkashin jam’iyyar APC ya gabatar a zaman majalisar ranar Alhamis.

Bassey ya ce majalisar ta samu labarin mutuwar Daniel cikin alhini. Marigayin ya taba zama shugaban kungiyar daliban Jami’ar Jihar Akwa Ibom kafin ya fara bautar kasa.

Sanatan ya bayyana cewa rahotanni sun nuna cewa Daniel ya mutu sakamakon matsalolin lafiya da suka biyo bayan wani ciwon kai da aka bayyana a matsayin mara tsanani, bayan zargin jinkirin samun isasshen kulawar likitoci a asibitin sansanin.

Ya ce lamarin ya haifar da tambayoyi masu muhimmanci game da ingancin ayyukan lafiya a sansanonin NYSC, musamman kasancewar kwararrun ma’aikatan lafiya, ingancin kayan aiki da kuma tsarin kai marasa lafiya asibitocin da za su iya ba su kulawar gaggawa.

Bassey ya jaddada cewa gwamnati na da nauyin kundin tsarin mulki na kare rayuka da jin dadin ’yan kasa, yana mai cewa wadanda aka tura bautar kasa sun cancanci samun ingantaccen kulawar lafiya.

Ya kara da cewa mutuwar Daniel ta jefa iyalansa, al’ummar jami’arsa da jihar Akwa Ibom cikin alhini.

Da yake goyon bayan kudirin, Sanata Tahir Monguno mai wakiltar Borno ta Arewa ya bukaci gudanar da cikakken bincike domin gano hakikanin abin da ya faru da kuma tabbatar da daukar matakan da suka dace.

Bayan amincewa da kudirin, majalisar ta umurci kwamitocinta kan harkokin ’yan sanda, shari’a, kare hakkin dan Adam da harkokin shari’a, bunkasa matasa da lafiya, tare da hadin gwiwar ’yan sanda da Hukumar Tsaro ta Farin Kaya (DSS), da su binciki ko sakaci ya taka rawa wajen mutuwar matashin.

Mataimakin Shugaban Majalisar Dattawa, Barau Jibrin, wanda ya jagoranci zaman, ya gode wa Bassey bisa gabatar da batun, tare da bukatar kwamitocin su gudanar da bincike mai zurfi domin gano gaskiyar lamarin.