Sojoji Sun Kashe ’Yan Fashi Guda Uku, Sun Ceto Mutumin Da Aka Sace A Edo

Dakarun Sojojin Najeriya, tare da haɗin gwiwar jami’an Hukumar Tsaro ta Farin Kaya (DSS), ’yan sanda, mafarauta da masu gadin dazuzzuka, sun kashe wasu mutane uku da ake zargi da garkuwa da mutane, tare da ceto wani mutum da aka sace a Jihar Edo.

An gudanar da aikin ne ranar Lahadi a dajin Sasaro, da ke Ƙaramar Hukumar Akoko-Edo ta jihar.

Mataimakin Daraktan Hulɗa da Jama’a na Rundunar Sojin Najeriya ta 4 Brigade da ke Benin City, Kennedy Anyanwu, ne ya bayyana hakan a wata sanarwa da ya fitar ranar Litinin. Ya ce dakarun Bataliya ta 195 sun gudanar da samamen ne bayan samun sahihan bayanan sirri kan ayyukan masu garkuwa da mutane a yankin.

Sanarwar ta ce lokacin da dakarun suka tunkari waɗanda ake zargin, sun buɗe musu wuta. Sai dai sojojin sun mayar da martani, lamarin da ya haifar da musayar wuta, inda aka kashe mutum uku daga cikin waɗanda ake zargin, tare da kuɓutar da wanda aka sace.

An bayyana wanda aka ceto da suna Prince Michael Akao, mai shekaru 44.

Kayayyakin da jami’an tsaro suka kwato sun haɗa da bindigogi ƙirar gida guda uku, alburusai tara, kayan abinci, tocila biyu, adduna biyu, wayoyin hannu biyar, na’urorin cajin waya guda biyu, tukwanen girki biyu da faranti uku.

Sauran kayayyakin sun haɗa da kwalbar mai, takalma guda biyu, silifas guda uku, hular sanyi, fakitin sigari uku, wasu ƙwayoyi da ake zargin miyagun ƙwayoyi ne, kayan tsafi, bokiti da kayan sawa.

Anyanwu ya ce an kai mutumin da aka ceto asibiti domin duba lafiyarsa, inda aka tabbatar cewa yana cikin kwanciyar hankali.

Ya ƙara da cewa an miƙa kayayyakin da aka kwato ga ofishin DSS da ke Igarra, yayin da aka miƙa gawar waɗanda aka kashe ga sashen ’yan sanda na Igarra domin ɗaukar matakan da suka dace.

Kwamandan Rundunar Sojin Najeriya ta 4 Brigade, Birgediya-Janar Ahmed Balogun, ya yaba wa dakarun bisa jajircewa, ƙwarewa da gaggawar mayar da martani yayin arangamar. Ya kuma yaba wa sauran hukumomin tsaro da suka haɗa kai wajen gudanar da aikin.

Balogun ya tabbatar wa mazauna Jihar Edo cewa rundunar za ta ci gaba da matsa lamba kan masu garkuwa da mutane da sauran masu aikata laifuffuka a yankin.

Ya ce dakarun za su ci gaba da gudanar da samame bisa sahihan bayanan sirri domin hana masu laifi samun mafaka, kare rayuka da dukiyoyi, da samar da yanayin tsaro da zai ba mutane damar gudanar da noma, kasuwanci da sauran ayyukan halal.

Kwamandan ya kuma yi kira ga jama’a da su riƙa kai wa jami’an tsaro bayanai masu inganci cikin gaggawa, yana mai cewa haɗin kan al’umma na da muhimmanci wajen hana aikata laifuffuka da inganta tsaro a jihar.