PDP Ta Tuntuɓi INEC Kan Cire Sunayen Wasu ’Yan Takararta Daga Jerin ’Yan Takarar 2027

Jam’iyyar Peoples Democratic Party (PDP) ta ce tana tattaunawa da Hukumar Zaɓe Mai Zaman Kanta ta Ƙasa (INEC) domin warware matsalar cire sunayen wasu daga cikin ’yan takararta daga jerin sunayen ’yan takarar da za su fafata a zaɓen 2027.

Mai magana da yawun ɓangaren PDP mai goyon bayan Ministan Babban Birnin Tarayya Abuja, Nyesom Wike, Jungudo Mohammed, ne ya bayyana hakan a wata sanarwa da ya fitar ranar Lahadi.

Wannan na zuwa ne bayan INEC ta wallafa jerin sunayen ’yan takarar gwamna na ƙarshe ranar Asabar, inda rahotanni suka ce ba a saka wasu ’yan takarar PDP ba, ciki har da Isa Pantami na Jihar Gombe da Ladi Adebutu na Jihar Ogun.

Mohammed ya ce jam’iyyar na damuwa da wannan lamari, kuma ta fara tattaunawa da hukumar zaɓen domin magance matsalar bisa tanade-tanaden doka da ƙa’idojin zaɓe.

“Saboda haka, PDP na tabbatar wa duk waɗanda abin ya shafa cewa tana ɗaukar wannan lamari da muhimmancin da ya dace, kuma za ta sanar da ƙarin bayani idan lokaci ya yi. Jam’iyyar ta ƙuduri aniyar tabbatar da cewa an magance dukkan korafe-korafen da suka dace tare da hukumar,” in ji sanarwar.

Ya buƙaci ’yan takarar da abin ya shafa, mambobin jam’iyyar da magoya bayanta su kwantar da hankalinsu, tare da guje wa kalamai ko matakan da za su iya kawo cikas ga tattaunawar da ake yi da INEC.

Rikicin ya taso ne a daidai lokacin da ake fuskantar tasirin shari’a sakamakon hukuncin da Kotun Ƙoli ta yanke ranar 24 ga Satumba kan wasu sassan Dokar Zaɓe ta 2026 da kuma tsarin tsayar da ’yan takara a zaɓen 2027.

Tun da farko, INEC ta bayyana cewa za ta tantance yadda hukuncin zai shafi tsarin tsayar da ’yan takara.

Kwamitin alƙalai bakwai na Kotun Ƙoli ya amince da ƙarar ɗaukaka ƙara da INEC ta shigar, inda ya dawo da sassan 77(5), 77(6), 77(7) da 84(2) na Dokar Zaɓe ta 2026.

A hukuncin farko da Mai Shari’a Adamu Jauro ya karanta, kotun ta bayyana cewa tanade-tanaden, waɗanda Kotun Ɗaukaka Ƙara ta soke a watan Yuli, ba su saɓa wa Kundin Tsarin Mulkin Najeriya na 1999 ba.

Sashe na 77(5) ya wajabta wa jam’iyyun siyasa miƙa rajistar mambobinsu ga INEC aƙalla kwanaki 21 kafin zaɓen fidda gwani, taron zaɓen shugabanni ko babban taron jam’iyya. Waɗanda sunayensu ke cikin rajistar da aka miƙa ne kaɗai za su iya shiga waɗannan ayyuka.

Sashe na 77(6) ya hana jam’iyyun siyasa amfani da wata rajistar mambobi dabam da wadda suka miƙa wa INEC wajen gudanar da zaɓen fidda gwani da sauran tarukansu.

Haka kuma, sashe na 77(7) ya tanadi cewa jam’iyyar da ta gaza miƙa rajistar mambobinta cikin wa’adin da aka kayyade ba za ta iya tsayar da ɗan takara a zaɓen ba.

PDP ta ce za ta ci gaba da sanar da jama’a duk wani sabon ci gaba yayin da tattaunawarta da INEC ke gudana.