Sojoji sun kai farmaki maɓoyar ƴan ta’adda a jihar Anambra

Sojoji sun kai samame inda suka lalata sansanin ‘yan ta’adda a Abator dake karamar hukumar Ogbaru ta jihar Anambra, suka kuma kwato makamai da harsasai tare da gano harsashi guda biyu da wasu kayan da ake zargin za a yi amfani da su wajen kera bama-bamai na gida wato  (IEDs).

Sanarwar ta ce sojojin sun kwato kayan da ake amfani da su wajen ayyukan kungiyar yan ta’addan, ciki har da janareta na hasken rana, rawa bank, baturin mota, batura na babur guda biyu, solar guda biyu da wayoyi guda biyu.

Rundunar sojin ta bayyana cewa wannan bankaɗo wurin da aka yi  ya tona asirin cibiyar kayan aiki da ke tallafawa ayyukan ta’addanci da garkuwa da mutane a yankin, tare da samar da karin bayanan sirri don ci gaba da lalata sauran cibiyoyin su.


“An fara gudanar da ayyuka na bin sawun ‘yan ta’addan da suka gudu, tare da kama abokan huldarsu, masu samar da kayan aiki da sauran masu taimaka musu, yayin da sojoji ke ci gaba da aiki tare da hukumomin tsaro da shugabannin al’umma domin karfafa tsaro da kare jama’a.” a cewar sanarwar.

Sojoji sun ce aikin ya gudana tare da kungiyar ƴan bijilante ta Anambra, bayan ceto wasu mutane uku da aka yi garkuwa da su da kuma kama wani da ake zargin mai garkuwa da mutane ne wanda ya kai sojoji sansanin.

“Bayan an yi garkuwa da mutane uku a yankin Osakwa na karamar hukumar Ihiala, sojojn rundunar Operation UDO KA tare da ƴan bijilante na Anambra suka gudanar da aikin ceto kuma suka kubutar da wadanda aka yi garkuwa da su,” in ji sanarwar.

“Ranar 1 ga Oktoba 2026, sojoji suka gudanar da samame suka kama wani da ake zargin mai garkuwa da mutane mai suna Sunday Obi. A lokacin bincike, wanda ake zargin ya bayar da bayanan da suka kai sojoji sansanin kungiyar a Abator, Ogbaru LGA, a gabar Isieke.”

“Bisaso ga bayanan sirri, sojoji da aka tattara sun kai farmaki zuwa wurin da aka gano, inda suka yi amfani da kwale-kwale wajen ketare ruwa domin isa sansanin ‘yan ta’addan. Da suka isa wurin dakarun sun jyi artabu da ƴan ta’addan wanda ya tilasta musu gudu da raunukan harbin bindiga.”

Sojoji sun ce sun kwato bindigogi AK-47 guda biyu da mujallu, bindigogi pump-action guda uku, bindigogi na gida guda uku, harsashi 62 na 7.62mm na NATO da harsashi 149 na 7.62mm.