Shugaban ƙaramar hukumar Bungudu ya shaki iskar yan ci bayan kwana 60 a hannun ƴan bindiga

Nura Abdullahi, shugaban karamar hukumar Bungudu ta jihar Zamfara da aka yi garkuwa da shi, ya samu ’yanci bayan da ya shafe kwanaki 61 a hannun masu garkuwa da mutane. 

A cewar kamfanin dillancin labarai na Najeriya NAN, Aliyu Danja, jami’in yada labarai na rundunar hadin gwiwa ta,Operation FANSAN YAMMA  dake aikin samar da tsaro a yankin arewa maso yamma shi ne ya sanar da haka a Gusau, babban birnin jihar Zamfara, a cikin wata sanarwa da ya fitar ranar Alhamis. 

An yi garkuwa da Abdullahi a ranar 25 ga Yuli, 2026, lokacin da ’yan bindiga suka kai hari gidansa a garin Bungudu inda aka yi artabu da jami’an tsaron dake tsare gidansa..  A yayin artabun, an kashe mambobin tsaron sa hudu — ’yan sanda biyu da ’yan sa-kai biyu. 

Danja ya ce shugaban karamar hukumar tare da wasu mutane hudu sun tsere daga hannun masu garkuwa da su da safiyar Alhamis. 

A cewarsa, dakarun rundunar Operation FANSAN YAMMA sun karɓe su a yankin karamar hukumar Kaura Namoda. 

“Sun tsere ne a yayin wani samame da dakarun suka kai kan maboyar ’yan ta’adda a yankin, sannan aka karɓe su daga dakarun da ke wurin,” in ji shi. 

“An samar musu da kariya, aka kai su cibiyar lafiya ta sojoji, inda ake kula da lafiyarsu da kuma gudanar da bincike da tambayoyi na yau da kullum.” 

Danja ya ce ɗaya daga cikin waɗanda aka ceto ya riga ya haɗu da iyalansa, yayin da ake shirye-shiryen haɗa sauran da iyalansu da kuma gwamnatin jihar Zamfara.