Kotu ta soke takarar Pantami a ƙarƙashin jam’iyar PDP

Babbar kotun tarayya dake Gombe ta soke zaɓen da aka yi wa, Sheikh Isa Ali Ibrahim Pantami a matsayin dan takarar jam’iyyar PDP a zaben gwamnan jihar na shekarar 2027.

Kotun, a hukuncin da mai shari’a Amina Aliyu Mohammed ta yanke a ranar Alhamis, ta umarci jam’iyyar PDP da ta gudanar da sabon zaben fidda gwani na gwamnoni bisa ga kundin tsarin mulkinta, ka’idoji da dokokin zabe da suka dace.

Hukuncin ya biyo bayan karar da Usman Garry, ɗan takarar gwamna na PDP, ya shigar inda ya kalubalanci yadda Pantami ya fito a matsayin ɗan takarar jam’iyyar.

A watan Mayu, Pantami ya janye daga zaben fidda gwani na APC da aka shirya gudanarwa a ranar 21 ga Mayu a jihar Gombe.

Pantami ya danganta janyewarsa daga takarar da zargin karya ka’idojin tsarin zabe.

Daga bisani ya koma PDP kuma ya fito a matsayin ɗan takarar gwamna na jam’iyyar a jihar Gombe a shekarar 2027.

Tsohon ministan ya samu tikitin ne ta hanyar amincewar murya a lokacin zaben fidda gwani na jam’iyyar.

Garry ya ƙi amincewa da fitowar Pantami a matsayin ɗan takara na ɓangaren Abdulrahman Mohammed, inda ya shigar da ƙara a kotu.

Garry ya nemi kotu ta soke fitowar Pantami bisa hujjar cewa PDP ba ta gudanar da sahihin zaben fidda gwani ba bisa ga dokokinta da dokokin zabe.

Bayan sauraron hujjojin ɓangarorin, kotu ta ɗage yanke hukunci a watan Yuli.

A zaman Alhamis, lauyan Pantami ya yi hujja cewa ya yi murabus daga APC a ranar 19 ga Mayu, 2026 kafin ya shiga zaben fidda gwani na PDP.

PDP ta kuma ƙalubalanci karar tare da neman kotu ta yi watsi da ita.

Sai dai lauyan Garry ya roƙi kotu ta yi watsi da ƙalubalen da aka gabatar kuma ta amince da buƙatun abokinsa.

Kotun ta umarci PDP ta gudanar da sabon zaben fidda gwani na gwamnoni bisa ga ka’idojinta da dokokin zabe da suka dace.