Wata Mata Ƴar Shekaru 51 Ta Rasu Bayan An Yi Mata Tiyatar Gyaran Jiki Sau Shida A Rana Ɗaya

Wata mata ‘yar shekara 51, Andreia Vieira Gaspar, ta rasu a Brazil bayan ta yi aikin gyaran jiki shida a lokaci guda yayin wata tiyata da ta ɗauki kusan sa’o’i takwas.

Andreia, wadda ke zaune a Spain, ta kashe kimanin reais 118,000, kwatankwacin dala 22,918, bayan ta shafe shekaru biyu tana tara kuɗin domin yin ayyukan da suka haɗa da gyaran fuska, fatar ido, cire kitse daga jiki da kuma ƙara kitse a fuska.

Rahotanni sun ce an yi mata tiyatar ne a birnin Goiânia a ranar 12 ga Agusta, kafin daga bisani ta rasu sakamakon matsalolin da suka biyo bayan aikin.

‘Yar uwarta, Djiane Vieira, ta nemi a gudanar da bincike kan mutuwarta, tana zargin cewa ba a yi mata cikakken gwajin lafiya da tuntubar likita kafin aikin a Brazil ba.

Ta kuma yi zargin cewa harshe Andreia ya kumbura sosai bayan tiyatar, kuma duk da ƙoƙarin neman taimakon likitoci, ba ta samu kulawar da ta dace ba.

Likitan da ya shiga aikin, Lessandro Martins, ya ƙi yin karin bayani kan yanayin lafiyar Andreia, yana mai dogaro da dokar sirrin bayanan marasa lafiya.

Shi kuwa lauya mai wakiltar asibitin Ankar ya ce an ba Andreia kulawar gaggawa nan take bayan samun matsalar, tare da ɗaukar matakan da suka dace domin ceto rayuwarta.

Hukumomin da abin ya shafa na shirin gudanar da bincike domin gano ainihin abin da ya haddasa mutuwarta.