INEC Ta Amince Da ‘Yan Takarar Shugaban Ƙasa 18 Na Zaɓen 2027

Hukumar Zaɓe Mai Zaman Kanta ta Ƙasa (INEC) ta fitar da sunayen ‘yan takarar shugaban ƙasa 18 da mataimakansu da za su fafata a zaɓen shugaban ƙasa na Janairu 2027.

Jerin sunayen, wanda sakatariyar INEC, Rose Oriaran-Anthony, ta sanya wa hannu, ya ƙunshi manyan ‘yan takara ciki har da Bola Tinubu na APC, Atiku Abubakar na ADC, Peter Obi na NDC da Omoyele Sowore na AAC.

Tinubu zai sake neman wa’adi tare da mataimakinsa, Kashim Shettima, yayin da Atiku ya tsayar da tsohon Ministan Sufuri, Rotimi Amaechi, a matsayin abokin takararsa.

A bangaren NDC, Obi zai yi takara tare da tsohon Gwamnan Kano, Rabiu Kwankwaso, yayin da Sowore zai yi takara tare da Haruna Magashi.

Sauran ‘yan takarar da INEC ta bayyana sun haɗa da Rufai Omo-Aje na AA, Abbas-Bin Aliyu na ADP, Yusuf Kabiru na APP, Seyi Makinde na APM da Adenuga Sunday na BP.

Haka kuma akwai Adebisi Olusoji na DLA, Sunday Okereke na Labour Party, Ada Okwori na NDP, Nkem Okereke na NRM, Donald Duke na PRP, Adewole Adebayo na SDP, Peter Agada na YPP da Daniel Nwanyanwu na ZLP.

Za a gudanar da zaɓen shugaban ƙasa da na Majalisar Dokoki ta Ƙasa a ranar 16 ga Janairu, 2027, yayin da zaɓen gwamnoni da na majalisun dokokin jihohi zai gudana a ranar 6 ga Fabrairu, 2027.

Jerin INEC ɗin ya kuma ƙunshi bayanan shekarun haihuwa, jinsi da cancantar karatu na ‘yan takarar shugaban ƙasa da mataimakansu.