PRP Ta Kare Shehu Buba, Ta Kalubalanci Masu Zargin Sa Da Shaida

Jam’iyyar Peoples Redemption Party (PRP) ta kare dan takararta na gwamnan Jihar Bauchi, Sanata Shehu Buba, tare da yin watsi da zarge-zargen da ke alakanta shi da ‘yan bindiga da masu garkuwa da mutane.

Jam’iyyar ta ce zarge-zargen wani yunkuri ne na yada karya domin bata sunan sanatan da kuma rage masa damar samun nasara a zaben gwamnan Bauchi na 2027.

A cikin wata sanarwa da ya fitar ranar Juma’a, Sakataren Yada Labarai na Kasa na PRP, Muhammed Ishaq, ya ce jam’iyyar ta yi shiru kan zarge-zargen ne da farko saboda ba ta son ba su damar samun karin karbuwa.

Sai dai Ishaq ya ce jam’iyyar yanzu ta tabbatar da cewa akwai wani gangamin bata sunan Buba.

Jam’iyyar ta kuma yi nuni da Sashe na 127(c) na Dokar Zabe ta 2026, wanda ya tanadi hukunci ga duk wanda ya yada bayanan karya kan halayya ko dabi’un dan takara da nufin rage masa damar samun nasara a zabe.

PRP ta ce tana da cikakken yakinin cewa Buba ya cancanci zama dan takararta, tana mai bayyana shi a matsayin sanata mai ci wanda ya taka rawa wajen yunkurin dakile matsalar aikata laifuka da ta addabi kasar.