Ƴan Sanda Sun Kama Ƴan Fashi Guda Hudu, Sun Kuma Kwato Jabun Dalolin Amurka A Bauchi

Rundunar ’yan sandan Jihar Bauchi ta ce ta kama mutane hudu da ake zargi da fashi da makami, tare da dakile wasu yunkurin safarar dalar Amurka da ake zargin jabu ce a Bauchi, Darazo da Yana.

Kakakin rundunar, SP Nafiu Habib, ya bayyana hakan a wata sanarwa da ya fitar ranar Laraba a madadin Kwamishinan ’Yan Sandan jihar, CP Sani-Omolori Aliyu.

A Bauchi, jami’an rundunar sun kama wasu mutane uku bayan wani matashi mai shekaru 19 daga Fadan Bayak, Jahun, ya kai rahoton cewa wasu mutane uku sun tare shi da misalin karfe 9 na dare tare da dora masa wuka a wuya, kafin su kwace wayarsa kirar Tecno Pop 9 wadda darajarta ya kai N80,000.

Binciken jami’an ya kai su wani daki da ke Unguwar Ardo, inda suka kama Usman Aliyu, Usman Musa da Aliyu Babangida. An kwato wukake uku daga hannunsu, ciki har da wadda ake zargin an yi amfani da ita wajen fashin.

Daga bisani, wadanda ake zargin sun kai jami’an zuwa gidan Usman Adamu, mai shekaru 18, inda aka gano wayar da aka sace. Rundunar ta ce daya daga cikin wadanda aka kama tsohon mai laifi ne.

A Darazo, an kama Adamu Umar, mai shekaru 25 daga Jihar Jigawa, bisa zargin yunkurin canza dalar Amurka da ake zargin jabu ce zuwa naira a yankin Nahutan.

Jami’an sun kwato takardun dala 67 da ake zargin jabu ne, adda da kuma wayar Tecno mai maballan hannu. Rundunar ta ce wasu mutane biyu da ake zargin suna tare da shi sun tsere.