Sanata Anthony Siyako Yaro dake wakiltar mazaɓar Kudancin jihar Gombe a majalisar dattawa ya sauya sheka daga jam’iyar PDP ya zuwa APC.
A wata sanarwa da aka fitar, Isma’ila Uba Misili darakta janar na yaɗa labaran gwamnan jihar Gombe, Muhammad Inuwa Yahaya ya ce Sanata Yaro shi ne mutum na baya-bayan nan a cikin jerin sauya shekar da gwamnan yake haɗawa.
Jaridar Daily Trust ta rawaito cewa tun da farko yan majalisar wakilai ta tarayya su uku sun koma jam’iyar ta APC ciki har da bulaliyar marasa rinjaye a majalisar, Hon Usman Bello Kuma wanda tun da farko ya koma jam’iyyar ta APC, sauran sun haɗa da Hon Ali Isa JC, Hon Abdullahi El-Rasheed da kuma Hon Inuwa Garba.
A cewar Misili sauya shekar ta su kara ƙarfin da jam’iyar take da shi a jihar.
