Shugaban Najeriya, Bola Ahmed Tinubu, ya amince da kasafin kuɗin ƙasar na shekarar 2026 wanda yawansa ya kai naira tiriliyan 68.32.
A cikin wata sanarwa da kakakin shugaban ƙasa, Bayo Onanuga, ya fitar, an bayyana cewa daga cikin wannan adadi, za a ware naira tiriliyan 15.8 domin biyan bashin ƙasa.
Sanarwar ta kuma nuna cewa an tanadi naira tiriliyan 15.4 domin gudanar da harkokin yau da kullum na gwamnati, yayin da aka ware naira tiriliyan 32.2 domin aiwatar da manyan ayyuka.
“Yayin da kusan rabin kasafin zai tafi a manyan ayyuka, hakan na nuna burin gwamnati na ci gaba da ayyukan daidaita tattalin arziki ta hanyar bunƙasa ɓangaren tsaro da samar da ayyukan more rayuwa da ci gaban kowane fanni”, in ji sanarwar.
Haka kuma, Shugaba Tinubu ya umarci hukumomin gwamnati da su tabbatar da bin ƙa’idoji, da yin aiki cikin gaskiya da kuma amfani da kuɗaɗen da aka ware musu yadda ya kamata.
A wani ɓangaren kuma, sanarwar ta bayyana cewa shugaban ya ɗage fara aiwatar da kasafin kuɗin shekarar 2025 zuwa ranar 30 ga watan Yunin 2026, maimakon ranar 31 ga Maris kamar yadda aka tsara a baya.
Shugaba Tinubu Ya Sanya Hannu Kan Kasafin Kuɗin 2026 Na Naira Tiriliyan 68.32
