Mutum daya ya rasa ransa yayin da daya ya jikkata sakamakon wani hari da wasu ‘yan bindiga suka kai ranar Litinin a kauyen Magamin Kano da ke karamar hukumar Ningi a jihar Bauchi.

‘Yan bindigar sun kuma kai farmaki gidan Hakimin kauyen Alh. Bashir Abubakar, kuma sun yi garkuwa da matarsa da dansa zuwa wani wuri da ba a san inda suke ba.

Wata majiya ta shaida wa manema labarai cewa ‘yan bindigar sun harbe mutum guda har lahira, yayin da kuma aka jikkata wani a cinyarsa amma yana samun kulawa a babban asibitin Ningi.

A cewar majiyar, basaraken ne aka fi kaiwa hari, amma ya samu nasarar tserewa, amma matarsa da dansa ba su yi sa’ar tserewa ba. An yi garkuwa da su.