NSCDC Ta Kama Kwamandan Niger Da Wasu Jami’ai 23 Kan Mutuwar Masu Hakarmar Ma’adinai 37

Hukumar Tsaron Fararen Hula ta Najeriya (NSCDC) ta kama jami’ai 24, ciki har da tsohon Kwamandan hukumar a Jihar Niger, Suberu Aniviye, yayin da ake gudanar da bincike kan mutuwar mutane 37 da ake zargin masu hakar ma’adinai ba bisa ka’ida ba ne a hannun hukumar.

Mai magana da yawun hukumar na kasa, Babawale Afolabi, ya bayyana hakan a wata sanarwa ranar Lahadi.

Afolabi ya ce Kwamanda Janar na NSCDC, Ahmed Audi, ya bayar da tabbacin cewa za a gudanar da binciken cikin bin ka’ida, gaskiya da kuma rikon amana.

Ya kuma ce duk wani jami’in da aka samu da laifi zai fuskanci hukuncin ladabtarwa na cikin gida da kuma hukuncin da doka ta tanada.

A cewarsa, adadin jami’an da ake bincike a kansu ya karu daga 21 zuwa 24 bayan gano wasu jami’ai uku da ake zargi suna da alaka da lamarin, wadanda aka dakatar tare da sauran wadanda ake bincike a kansu.