Mimiko Ya Ce Tinubu Ya Cancanci Wa’adi Na Biyu

Dr Abass Mimiko, dan takarar jam’iyyar Zenith Labour Party (ZLP) a zaben gwamnan Jihar Ondo na 2024, ya bayyana cewa Shugaba Bola Ahmed Tinubu ya cancanci sake lashe zaben shugaban kasa na 2027 domin ya ci gaba da aiwatar da manufofinsa.

Mimiko, wanda kanin tsohon Gwamnan Ondo, Olusegun Mimiko ne, ya bayyana hakan ne yayin da yake zantawa da manema labarai a garin Ondo ranar Lahadi.

Ya ce ya yi imanin cewa Tinubu ya samu nasarar fitar da tattalin arzikin Najeriya daga wani yanayi mai tsanani, musamman ta hanyar cire tallafin man fetur.

Ya kara da cewa Tinubu ya karbi mulki ne a lokacin da Najeriya ke fuskantar dimbin basussuka, matsalolin tattalin arziki, matsalar tsaro da kuma nauyin tallafin man fetur.