Hakkin mallakar hoto
Getty Images
Kungiyar Liverpool ta tashi 2-2 da Shrewsbury a wasan zagaye na hudu a gasar FA Cup da suka fafata ranar Lahadi.
Liverpool wadda rabon ta kai zagaye na biyar a FA Cup tun 2015 ta fara cin kwallo ne ta hannun Curtis Jones daga baya Donald Love ya ci gida.
Shrewsbury mai buga League One ta farke kwallayenta cikin minti 10 a damar makin da ta samu ta hannun Jason Cummings.
Tun farko magoya bayan Shrewsbury sun yi kuwa a lokacin da aka cire Callum Lang, sannan Cummings ya canje shi.
Cummings din ya ci kwallon farko a bugun fenariti, sannan ya farke ta biyu da hakan ya sa sai dai a buga wasa na biyu nan gaba a Anfield.
Tun kan tashi daga karawar Jurgen Klopp ya saka Mohamed Salah da Roberto Firmino don kada wankin hula ya kai su dare.
Ranar Litinin za a raba jadawalin zagaye na biyu, sannan a tsayar da ranar da Shrewsbury za ta ziyarci Anfield a karawa ta biyu.
