Rundunar ‘Yan Sandan Jihar Jigawa ta sanar da kama wasu da ake zargi da lalata kayayyakin lantarki, karɓar kayan sata da kuma satar shanu a samame daban-daban da ta gudanar bisa bayanan sirri.
Mai magana da yawun rundunar, SP Shisu Lawan Adam, ya ce an ƙwato igiyoyin lantarki, na’urar wasan PlayStation 5 (PS5), talabijin biyu na plasma da kuma shanu uku da ake zargin an sace.
Ya bayyana cewa an kama mutum uku kan zargin satar igiyoyin lantarki a Dutse, yayin da aka kama wani mutum ɗaya ɗan Kano da ake zargi da mallakar kayan sata da darajarsu ta kai kimanin Naira miliyan 2.5. Haka kuma, an kama wani da ake zargi da satar shanu, inda aka ƙwato shanu uku daga gidansa.
Rundunar ta ce an mayar da kayayyakin da aka ƙwato ga masu su, yayin da bincike ke ci gaba domin gano tare da kama sauran waɗanda ake zargi da hannu a laifukan.
‘Yan Sandan Jigawa Sun Kama Masu Satar Kayayyaki Da Barayin Shanu
