Ana kan neman zakuna 14 a kusa da garin Phalaborwa, na kasar Afrika ta Kudu, da suka tsinke daga gidan namun dajin Kruger National Park, gandun dajin ya mamaye tsawon kilomita 19,485 da ya hada yankunan Limpopo da Mpumalanga.
Ana kyautata zaton cewa wannan ne adadin zakuna mafi yawa da ya taba tserewa daga gandun dajin na Kruger, a baya bayan nan.
An ga zakunan guda goma sha hudu kusa da mahakar ma’adinai ta Foksor wanda ke kusa da gandun dajin.
An gargadi mazauna garin Phalaborwa da ke kusa da mahakar ma’adinan da su rika matukar sa ido, har zuwa lokacin da za a sake kama zakunan.
Ma’aikatan gandun dajin na bin diddigin wadannan zakuna domin ganin cewa sun kare jama’a daga fadawa hannunsu.
Shekara biyu da suka wuce, wasu zakunan biyar sun taba tserewa daga wannan gandun dajin a lardin Mpumalanga, inda sai da aka rika harbin su allurar sa barci kafin a samu sukunin sake kama su domin a mayar da su gandun dajin.
Shi dai gandun dajin an kewaye shi da shinge kuma hukumomi sun ce suna mamakin yadda aka yi wadannan dabbobi suka tsere.