Wata mata a Uganda ta haifi jarirai biyar ba zato ba tsammani, inda uku daga ciki mata ne yayin da ragowar biyun suka kasance maza.
Tun da farko dai likitoci sun shaida mata cewa tagwaye za ta haifa, kamar yadda jaridar Daily Monitor ta kasar ta ruwaito.
A baya dai, Sofiat Mutesi wadda ta fito daga kauyen Nawaikoke da ke gabashin kasar ta taba haihuwar tagwaye da ‘yan uku in ji jaridar.
“Na yi mamakin haihuwar ‘ya’ya biyar saboda lokacin da na je aka yi hoton cikin a cibiyar lafiya ta Nsinze, likitoci sun shaida min cewa ina dauke ne da tagwaye,” a cewarta.
An ruwaito cewa tana neman taimako don tallafawa ‘ya’yan nata.
A cewar jaridar Monitor, mijinta na fari ya rasu kuma mijinta na yanzu na da ‘ya’ya 20.
Maureen Babine, wata ungozoma a asibitin Iganga-Nakavule, ta ce mahaifiyar da jariranta na cikin koshin lafiya.
“A duk shekarun da na yi ina aiki a asibitin nan, ban taba ganin matar da ta haifi ‘ya’ya biyar ba. Muna samun ‘yan biyu dai da ‘yan uku… Jariran nata duk sun isa haihuwa, sai dai suna da kankanta kuma suna bukatar kula na musamman,” a cewar malamar jinyar.
[ad_2]