Tinubu zai dawo Najeriya ranar Lahadi

Shugaban ƙasa, Bola Ahmad Tinubu zai dawo gida Najeriya a ranar Lahadi biyo bayan hutun aiki da ya yi ƙasashen Turai kamar wadda majiya ta shedawa jaridar The Cable.

Majiyoyi dake fadar shugaban kasa sun ce ana sa ran Tinubu zai koma Lagos kuma zai zauna a can har tsawon mako guda kafin ya wuce Abuja.

Tinubu ya bar Najeriya zuwa Landan a ranar 30 ga watan Agusta, inda fadar shugaban kasa ta bayyana tafiyar a matsayin hutu na aiki na makonni uku a matsayin wani ɓangare na hutun shekara-shekara.

Daga baya ya tafi  birnin Paris na kasar Faransa, bayan ya shafe kusan mako guda a Birtaniya.

A ranar 21 ga watan Satumba, fadar shugaban kasa ta sanar da cewa Tinubu ya tsawaita zamansa a ƙasashen waje na wasu kwanaki kuma zai dawo Najeriya a ƙarshen mako.

Fadar shugaban kasar ta ce shugaban ƙasa ya ci gaba da kasancewa cikin hulɗa da jami’an gwamnati a gida tare da jagorantar harkokin gwamnati yayin da yake ƙasashen waje.

Rashin dawowar Tinubu ya tayar da muhawara ta kundin tsarin mulki, inda aka fara tambaya kan tasirin shugaban ƙasa ya kasance a wajen ƙasar fiye da kwanaki 21 ba tare da ya mika ikon mulki ga mataimakin shugaban ƙasa Kashim Shettima ba.