Sufeto Janar na ƴan sandan Najeriya, Olatunji Disu, ya umarci jami’an ƴan sanda a faɗin ƙasar nan su ɗauki mataki mai tsauri kan duk wanda aka samu da makamai ba bisa ƙa’ida ba.
Ya bayar da umarnin ne yayin ziyarar aiki da ya kai Jihar Benue, inda ya gana da Gwamna Hyacinth Alia a Makurdi domin tattauna matsalar hare-hare da kashe-kashen da suka addabi jihar.
Disu ya buƙaci jami’an su yi amfani da tanadin Force Order 327 wajen yaƙi da masu laifi. Haka kuma ya yi kira ga matasan Benue su haɗa kai da ƴan sanda ta hanyar bayar da bayanan sirri domin inganta tsaro.
A nasa ɓangaren, Gwamna Alia ya sake jaddada buƙatar kafa ƴan sandan jihohi a matsayin wata hanya ta ƙarfafa yaƙi da matsalolin tsaro.
Sufeto Janar Ya Umarci Ƴan Sanda Su Murƙushe Masu Makamai Ba Bisa Ƙa’ida Ba
