Sojoji sun ceto fasinjoji 13 da aka yi garkuwa da su a Benue

Dakarun rundunar Operation Whirl Stroke sun samu nasarar ceto fasinjoji 13 da aka yi garkuwa da su akan titin Makurdi zuwa Otukpo a jihar Benue lokacin da su ke tafiya a cikin wata motar haya ta kamfanin sufuri na jihar Benue da ake kira da Benue Links.

A cewar Zagazola Makama dake wallafa bayanai kan sha’anin tsaro akan yankin tafkin Chadi ya bayyana cewa mutanen na daga fasinjoji 17  dake cikin motar da aka yi garkuwa da su.

Tun da farko uku daga cikin fasinjojin sun samu nasarar tserewa daga hannun masu garkuwar.

Zagazola ya jiyo wata majiyar jami’an tsaro na faɗin cewa an samu nasarar kuɓutar da  mutanen ne a ranar Lahadi a wani gagarumin aikin nema da ceto da jami’an tsaro suka gudanar a wani daji dake mazaɓar Okete a ƙaramar hukumar Ohimini ta jihar.

Wasu daga cikin fasinjojin da aka kuɓutar ɗalibai ne dake kan hanyarsu ta zuwa zana jarabawar shiga jami’a ta UTME.