Akalla sojoji biyu da mayakan ISWAP da dama sun mutu bayan wani hari da ƴan ta’addar suka kai sansanin sojoji da ke Magumeri a jihar Borno.
Mai magana da yawun rundunar haɗin gwiwa ta sojoji, Laftanar Kanal Sani Uba, ya ce lamarin ya faru ne da safiyar Alhamis lokacin da mayaƙan suka yi yunƙurin kutsawa sansanin FOB MAGUMERI.
Ya bayyana cewa duk da cewa maharan sun samu damar karya wani ɓangare na sansanin, sojojin sun dakile harin tare da kashe mayaƙa da dama.
A cewarsa, binciken da aka yi bayan artabun ya nuna alamun jini da gawarwakin mayaƙan, lamarin da ke nuna cewa sun yi asara mai yawa.
Sojojin sun kuma ƙwato makamai da alburusai daga hannun maharan, ciki har da bindigogin PKT da AK-47.
Sai dai jami’an soji biyu sun rasa rayukansu yayin fafatawar, yayin da wani jami’i da wasu da suka jikkata ke samun kulawar likitoci. Haka kuma, gobara ta lalata wasu kayayyaki da gine-ginen wucin gadi a sansanin.
Sojoji Biyu Sun Rasa Rqyukansu Yayin Da Aka Kashe Mqyqƙan lSWAP Da Dama A Borno
