Sergio Ramos ya cika shekara 14 a Real Madrid

Kyaftin din tawagar Real Madrid Sergio Ramos ya cika shekara 14 a Santiago Bernabeu.

Dan wasan mai tsaron baya an gabatar da shi gaban magoya bayan Real a Bernabeu ranar 8 ga watan Satumbar 2005.

Ramos ya dade da karbar ragamar kyaftin din Madrid, kuma yana kaka ta 14 a Real, bayan nasarorin da ya samu, kuma yana kan ganiyarsa kawo yanzu.

Kwana biyu tsakanin da aka gabatar da shi gaban magoya baya ne ya fara buga Madrid wasa a karawa da Celta Vigo kuma a Bernabeu.

Kawo yanzu ya yi wa Real wasa sama da 609, shi ne na hudu a jerin wadan da suka yi a Real wasannin da yawa bayan Santillana mai 645 da Sanchís mai 710 da Casillas mai 725 da kuma Raúl da ya buga wa Madrid karawa 741.

Haka kuma mai tsaeron bayan ya ci kwallo 84 a kaka 14 da ya yi yana buga wa Real Madrid tamaula.

Akwai kwallaye na raba gardama da ya ci wa Real ciki har da wadda ya zura a raga a gasar cin kofin Zakarun Turai ta Champions League a 2014 da kuma 2016.

Haka kuma da wadda ya ci a UEFA Super Cup a 2016 da kuma a kofin duniya na Zakarun nahiyoyi da ya ci a 2014 da 2018.

Ramos ya lashe kofi 20 a Real da suka hada da Champions League hudu da Club World Cup hudu da UEFA Super Cup uku da LaLiga hudu da Copas del Rey biyu da kuma Spanish Super Cup uku..