Likitan Shugaban Amurka, Donald Trump, Dokta Sean Barbabella, ya bayyana cewa shugaban na cikin ƙoshin lafiya kuma yana da cikakken ƙarfin ci gaba da gudanar da ayyukan shugabancin ƙasa.
A wata sanarwa da Fadar White House ta fitar, likitan ya ce gwaje-gwajen lafiya da aka yi wa Trump sun nuna yana da ɗan kumburi a ƙafafunsa da wasu ƙananan tabo a hannuwansa, amma ba su da wata barazana ga lafiyarsa.
Barbabella ya ce zuciyar shugaban, huhunsa da sauran sassan jikinsa suna aiki yadda ya kamata, yana mai ƙara da cewa Trump na da ƙoshin lafiya da zai ba shi damar ci gaba da sauke nauyin shugabancin ƙasa da kuma jagorancin rundunar sojin Amurka.
An gudanar da binciken lafiyar Trump na shekara-shekara ne a ranar ashirin da shida ga watan Mayu. Trump, wanda zai cika shekara tamanin a watan Yuni, shi ne mutum mafi tsufa da ya taɓa zama shugaban ƙasar Amurka.
Likitan Trump Ya Tabbatar Da Yana Cikin Koshin Lafiya
