Sabon Sarki Naruhito na Japan ya yi jawabinsa na fari bayan da ya dare karagar mulki, kuma yayi fatar samun farin ciki da zaman lafiya a duniya.
An gudanar da wani biki a Fadar Imperial ranar Laraba inda ya dare karagar mulkin kasar.
Wani sabon karni mai suna Reiwa – wanda ke nufin oda da tsari – ya fara kenan har karshen mulkinsa.
Mahaifinsa Akihito mai shekara 85 ya kasance sarki na farko da ya sauka daga mukaminsa ranar Talata a tsawon fiye da shekara 200.
Sarki Naruhito mai shekara 59 da haihuwa ya gode wa mahaifinsa tsohon Sarki Akihito.
“Ya gudanar da dukkan ayyukansa da sadaukar da kai na tsawon fiye da shekaru 30,” inji shi. “Ya kuma nuna tausayawa ga gajiyayyun cikin al’ummarsa. Ina son mika godiya ta musamman da jinjina a gare shi.”