Real Betis ta mayar da Real Madrid matsayi na biyu a La Liga

Hakkin mallakar hoto
Getty Images

Real Madrid ta sha kashi a hannun Real Betis ci 2-1 inda yanzu ta dawo matsayi na biyu a teburin gasar La Liga.

Yanzu Barcelona ke jagorantar teburin gasar bayan ta doke Real Sociedad 1-0 a ranar Asabar.

Yanzu tazarar maki biyu Barcelona ta ba Real Madrid duk da a makon da ya gabata ta doke Barcelona a karawar hamayya ta El Clasico.

Da Silva Júnior ne ya fara jefa wa Betis kwallon farko a ragar Madrid a minti na 40 kafin daga bisani Karim Benzema ya farke da Fanareti.

Dab da tashi daga wasan tsohon dan wasan Barcelona Cristian Tello ya jefa kwallo ta biyu a ragar Madrid a daidai minti na 82.

Yanzu dai Madrid za ta buga wasanta na gaba ne da Eibar ranar Juma’a, kafin tsakiyar mako ta kai wa Manchester City ziyara a Ingila a karawar gsar zakarun Turai.

A karawa ta farko Madrid ta sha kashi ne a gida hannun Manchester City.