Hukumar kashe gobara ta jihar Oyo ta ce mutane shida ne suka rasa rayukan su a wani hatsarin mota da ya rutsa da manyan motar daukar kaya, tankar gas da kuma ƙananan mota a kan hanyar Ibadan zuwa Lagos.
Hatsarin ya faru ne a ranar Juma’a da daddare bayan da motocin suka ayi arangama abin da ya haifar da tashin gobara da ta kone motocin tare da kawo tsaikon zirga-zirgar ababen hawa a hanyar.
A wata sanarwa da aka fitar, Moroof Akinwande shugaban hukumar kashe gobara ta jihar Oyo ya ce an samu nasarar ceto wasu mutane 8 daga motocin kuma tuni aka miƙa su ga jami’an hukumar kiyaye afkuwar haɗura ta ƙasa FRSC.
Akinwande ya ce hukumar ta samu kiran kai daukin gaggawa da misalin ƙarfe 09:29 daga wani ɗan sanda mai suna Sola Rotimi inda tuni tayi gaggawar tura jami’an kashe gobara ya zuwa wurin.
A cewarsa da zuwan jami’an aikin ceto wurin sun iske motoci shida na ci da wuta da suka haɗa motar ɗaukar iskar gas, tireloli da kuma ƙananan motoci guda biyu.
