Hakkin mallakar hoto
Getty Images
Babban jami’in Inter Milan, Beppe Marotta ya ce ba za su kara farashi kan tayin da suka yi wa dan kwallon Manchester United, Romelu Lukaku ba.
Inter ta taya dan wasan tawagar Belgium fam miliyan 54, inda United taki sallamawa ta kuma bai wa kungiyar ta Serie A wa’adin kammala cinikin dan kwallon.
United ba ta je da Lukaku wasan sada zumunta da za ta yi ranar Talata da Kristiansund a Norway ba, bayan da bai buga wasa hudu da ta yi a Australia da Singapore da kuma China ba, sakamakon jinya.
Marotta ya ce farashin da suka yi wa Lukaku daidai yake da darajar dan wasan, ya kuma kara da cewar akwai iya kacin cinikin da za su iya yi wanda kowa zai amfana.
A ranar Litinin United ta sanar a shafinta na Intanet cewar Lukaku baya cikin ‘yan wasa 26 da za ta je da su wasan sada zumunta ranar Talata a Norway.
Mai tsaron baya ma Eric Bailly baya cikin wadanda aka bayyana da za su buga wa United wasan, har da Matteo Darmian da kuma Alexis Sachez.
Sanchez ya yi rauni ne a gasar Copa America wasan neman mataki na uku da suka kara da Argentina a farkon watan nan.
Wasan da za a yi a garin Ole Gunnar Solskjaer zai zama shirin fafatawar da United za ta yi da AC Milan a Cardiff ranar Asabar.
‘Yan wasan da United ta bayyana
De Gea da Grant da Pereira da Romero da Dalot da Jones da Lindelof da Rojo da Shaw
Smalling da Tuanzebe da Wan-Bissaka da Young da Fred da Gomes da James da Lingard da Mata
Matic da McTominay da Pereira da Pogba da Chong da Greenwood da Martial da kuma Rashford.
