Har yanzu babu sauyi a Old Trafford, inji Mourinho

Jose Mourinho ya yi magana game da halin da Manchester United ta tsinci kanta a farkon Premier bana, kuma ya yi imanin cewa babu wani ci gaba da ta samu tun bayan tafiyarsa.

Ole Gunnar Solskjaer ya karbi aikin Man United daga hannun Mourinho a kakar wasannin da ta gabata kuma dan kasar Portugal din ya tuna lokacinsa a Old Trafford.

“Ba mu da kyau a kakar da ta gabata amma ni ban ga wani ci gaba ba a yanzu duk da zuwan sababbin ‘yan wasa guda uku, ‘yan wasa masu hazaka,” Mournho ya fada sanda ya bayyana a gidan talabijin na Sky.

“Suna shigo da zakakuran ‘yan wasa, sai dai kungiyar a matsayinta na kulob ne ni ba ta yi mani ba.

“An kore ni, babu mamaki na cancanci a kore ni din tunda ni ne koci. Sai dai abin haushin shi ne har yanzu ba su canza ba.

“Mutane suna tunanin ina jin dadin abin da yake faruwa, ba na jin dadi kwatakwata.”

Tsohon kocin Real Madrid da Chelsea da Inter Milan din ya yi hasashen cewa Manchester United za ta kare a tasakanin mataki na hudu zuwa na shida.

• Akwai jan-aiki a gabanmu a La Ligar bana – Suarez
• Liverpool ta ci gaba da jan zarenta a Premier