El-Rufai Na Girbar Abin Da Ya Shuka Ne – In Ji Shehu Sani

Tsohon Sanatan Kaduna ta Tsakiya, Shehu Sani, ya ce tsohon Gwamnan Kaduna, Nasir El-Rufai, na fuskantar sakamakon abin da ya aikata a lokacin da yake mulkin jihar.

Shehu Sani da El-Rufai sun shafe shekaru suna takun-saka a siyasar Kaduna, musamman a lokacin da El-Rufai ke gwamna tsakanin 2015 zuwa 2023.

Rikicin siyasar tasu ya ƙara tsananta lokacin da Shehu Sani ke wakiltar Kaduna ta Tsakiya a Majalisar Dattawa, inda ya yi adawa da wasu buƙatun neman rance da gwamnatin El-Rufai ta gabatar.

A matsayinsa na shugaban kwamitin Majalisar Dattawa kan basussuka a wancan lokacin, Shehu Sani ya ƙalubalanci buƙatar gwamnatin Kaduna ta karɓo rancen dala miliyan 350 daga Bankin Duniya. Daga bisani, Majalisar Dattawa ta yi watsi da buƙatar.

Matakin ya ƙara tsananta rashin jituwarsu, inda gwamnatin El-Rufai ta zargi Shehu Sani da yin zagon ƙasa da kuma kawo cikas ga ayyukan ci gaban jihar.

Da yake magana a wata hira da gidan talabijin na Channels a ranar Juma’a, Shehu Sani ya ce El-Rufai na “biyan bashin” abin da ya kira rashin kyakkyawan shugabanci da rashin yin abin da ya dace a lokacin da yake kan mulki.

Sani ya zargi gwamnatin El-Rufai da rashin kyakkyawan shugabanci, amfani da ƙarfin gwamnati wajen murƙushe abokan hamayya da kuma tsare wasu daga cikinsu.

Ya kuma zargi gwamnatin da gazawa wajen magance matsalolin tsaro, musamman a Kudancin Kaduna, tare da yin zargin cewa salon mulkin El-Rufai na nuna wariya.

Shehu Sani ya ce halin da tsohon gwamnan ke ciki ya kamata ya zama darasi ga sauran masu rike da mukaman gwamnati, domin su yi taka-tsantsan wajen gudanar da mulki.