Kayataccen bugun tazara da Pierre-Emerick Aubameyang ya buga ne ya tabbatar wa da Arsenal nasara a Emirate bayan ta farke kwallo biyu da Aston Villa ta saka mata a raga.
Aubameyang ya cilla kwallonsa ta bakwai ne a raga ana saura minti shida a tashi daga wasan da suka kare shi da mutum 10 a fili bayan an kori Ainsley Maitland-Niles tun a minti na 41.
Villa sun shiga gaban Arsenal ne ta hannun John McGinn a minti na 20. Arsenal ta rama ta hannun finaretin sabon dan wasa Nicolas Pepe, wadda ita ce kwallonsa ta farko ga Gunners.
Kasa da minti biyu bayan haka Wesley ya sake saka Villa a gaba bayan Jack Grealish ya bugo masa kwallo a sama.
Saura minti tara a tashi daga wasa Calum Chambers ya farke wa Arsenal, kafin makararren harin da Aubameyang ya kai, wanda ya bai wa Gunners din nasararsu ta uku a Premier.
Hakan ya sa Arsenal ta dawo cikin ‘yan hudun farko da maki 11 a mataki na 4.