WASHINGTON, DC —
Yayin da matsalar fyade ke kara karuwa fiye da wutar daji a Najeriya, rundunar tsaron farin kaya ta Sibil Difens a jihar Adamawa, na samun nasara wajen bankado mabuyar wadannan bata gari dake addabar al’umma.
A kwanakin baya ne aka cafke wani jagoran wasu da kewa kananan yara fyade a Yola, inda dubunsa ta cika. Nuraddeen Abdullahi kwamandan rundunar tsaron ta sibil difens a jihar, yace wanda aka kama mai kimanin shekaru 30 da haihuwa, Mohammad Babangida an cafke shi ne yana yiwa wata ‘yar shekara tara fyade.
A wata sabuwa kuma jami’an ‘yan sanda a jihar, sun kai samame wani gidan tsare kangararru, inda ake tsare jama’a ba bisa ka’ida ba. A lokacin wannan samame an kubutar da mutane 15.
DSP Suleiman Yahya Nguroje, wanda shine kakakin rundunar ‘yan sandan jihar yayi wa wakilin muryar Amurka Ibrahim Abdul’aziz karin haske game da wannan batu.
