An Kama Wani Bisa Zargin Hallaka Mahaifiyarsa Da Adda

Rundunar ’Yan Sandan Jihar Abia ta tabbatar da kama wani mutum mai suna Livingston Nwakanma, bisa zargin kashe mahaifiyarsa, Mrs Nwaigbe Nwakanma, da adda a Osaa Ukwu, karamar hukumar Obingwa ta jihar.

Jami’in hulda da jama’a na rundunar, DSP Maureen Chinaka, ta tabbatar da kama wanda ake zargin.

Ta ce hedikwatar ’yan sandan sashen Eastern Ngwa ta samu kiran gaggawa kan lamarin a ranar 19 ga Satumba, 2026, inda jami’ai suka isa wurin cikin gaggawa.

A cewar Chinaka, jami’an sun tarar da mahaifiyar wanda ake zargin kwance a wurin bayan an ji mata mummunan rauni da adda, kuma wani jami’in lafiya ya tabbatar da rasuwarta. Daga bisani aka kai gawarta dakin ajiye gawa.

Ta ce jami’an sun kuma kubutar da Livingston daga hannun wasu fusatattun mutane da ke kokarin kashe shi, kafin a kai shi asibiti domin samun kulawar lafiya.